"Peppi, Jien ma naqbilx li jkun hemm reġistru għax jien waħda li għaddejt min dan fil-familja u biex nipproteġi t-tfal ma rridx li isem missierhom ikun fuq reġistru. Aħjar tawh il-kura milli ħabs biss! Vera li min għandu t-tfal irid jipproteġihom minn dawn imma dawn mhux fir-reġistru qegħdin imma fejn l-inqas tistenna jew tissuspetta li se ssibhom. Tgħallem kemm tgħallem lit-tfal qatt ma tista' sserraħ rasek qatt. Tiegħi mgħallmin kienu u xorta għaddew minnha. Aħjar isir xi programm bl-esperjenzi ta' min ġarrab għax dawk ikunu jafu x'qed jgħidu. Ħadd mhu se jiġi fil-programm speċjalment jekk ikun fil-familja imma l-esperjenza tagħhom tiftaħ għajnejn in-nies sew tista'.
Imġarrba"

Din kienet persuna fil-forum li laqtitni. Insewgi dak li qed jiġri fil-forum ghax nitgħallem. Hawn fuq għandna lil xi ħadd li jidher li għadda minnha. Dawk kollha li jaqblu mar-reġistru ta' reati sesswali għandhom jifhmu li dawn il-persuni ikollhom it-tfal, il-ġenituri tagħhom, lil ħuthom. Li tkun tifel jew tifla u tmur l-iskola b’isem missirek jiġri ma’ kullimkien li hu pedofelu, dan mhux abbuż fuq dawn l-istess tfal? L-iskandlu f'dan il-pajjiż huwa li għadna Aġenzija Appoġġ li tagħmel xogħol tajjeb ħafna li għandha għajnuna għal kullħadd inkluż per eżempju dawk li jsawtu lil partner tagħhom - u m'għadniex għajnuna għal dawk li għandhom dawn ix-xewqat li jekk iċedu għalihom ikunu ta periklu kbir għal uliedna.

Għawdex kemm ħadna gost. Il-folla li ħonqot it-teatru Astra mimljija enerġija anke meta kienu ilhom għadejjin 3 siegħat. Lil Morena jħobbuha u bir-raġun. Morena tgħamilha ċara li sejra biex tagħti performance tajba u l-bqija tħallih f'idejn il-Bambin. Din attitudni li togħġobni li qatt ma rajtha qawwija daqshekk fost kantanti ohra. Qaltli li għandha żewġ ilbiesi lesti għall-final. Waħda biex tilbes għal fuq il-palk jekk tgħaddi u l-oħra biex jekk ma tgħaddix tmur fis-sala ssegwi l-festival u tibbażja ma' dawk li għaddew. L-akbar sponsor ta’ Morena huwa Ġesu' Kristu. U ma tgħidiex biex timpressjonha imma għax temminha. Sirt naf ukoll li Morena tagħmel ħafna xoghol maż-żgħażagħ.

Meta ltqajt ma' Gerald James Borg biex nippreparaw għall-programm ta' qabel il-Eurovision minn Għawdex rajtu jirrabja għall-ewwel darba f’ħajti.
Staqsejtu "Allura x'messaġġ fiha din id-diska Vodka?"
Ħraqtu.
Qalli "Mela llum id-diski jkun fihom bilfors messaġġ. Din l-idea li aħna niktbu s-songs għax naħsbu li twelidna biex inbiddlu id-dinja m'għadiex teżisti. Din song biex in-nies jieħdu pjaċir jisimgħu u jħossu li jridu."
Nahseb li Gerald għandu raġun. Hawn Malta għadna mkaħħlin li ktieb, programm tat-televixin jew radju jrid jgħallem, irid ikollu messaġġ. Frankament inħares lejn din l-atitudni bħala arroganza ta’ min jaħseb li huwa moralment ‘il fuq mill-oħrajn u jrid jgħallimna kif għandna ngħixu.

Hafna nies jgħiduli li fl-aħħar Xarabank għandu jkollu konklużjoni, xi ħadd jgħid x'inhi l-verita'. Fil-blog li jmiss ngħidilkom għala naħseb li jekk nagħmlu hekk inkunu qed noqtlu lil Xarabank...

niltaqgħu,
Peppi